Matthew 24

Sipi mono nohi sibina hilibe luto Yesu lu'ehina

Mk 13:1-2; Lk 21:5-6

1Yesu mono nohi he'miloto nobigo enali koko panana'amagi aitoga e'ahana. Enali sipi mono nohi ni'ina'mu lepilune'mu hi'ahana. 2Ya hago Yesu ma luto lu epi'ehina: Lenali ma asaga'na bu ge'ahafihe? Nani ma'naka luto lu nolepube, asaga efahi ma ninaya he'minogo ikupilo akupilo hite meminalina'mu yabe. Enali ibe fologobe hite meluguko limo i su halina'mu yabe.

Ketana babu luto huto hilina'mu Yesu lu'ehina

Mk 13:3-13; Lk 21:7-19

3Yesu Oliba kosagu nohigo koko panana'amagi suguna'i ete ma lite loka he'ahana: Hiya yupahi ya'ma asaga'na huto hilina ni'ibe? Hena huse kana yata'a huto hinogo, to yatai ma me'i su nohenogo kai alube'mu nohane luto liluta ni'ibe?

4Yesu ka'anilo nona'a ma luto lu epi'ehina: Lenali kaba hu bati hilo. Bo moneuba lenimi'i molo lalibe'mu nolube. 5Babu bona'i elete nani nigi'ni nehete ma lite lilana'mu yabe: Nani'ni Mesia nohube. Hu'mau noho lifi'ehina bo lenubuto bilube'mu nohube, ya lilabe. To enali babu boana'i enimi'i malalana'mu yabe. 6Lenali lebato luba nehanamofihi nogo'a kehelilana'mu yabe. To foto'i nehilana lubamofihi kaga'a kehelilana'mu yabe. Ya hu'ehina lenali koli mehilo. Ya'ma asaga'na huto hilinaya to ana su halina kana'a mana'a huto mehu'ehilibe. 7Mone naga'magi ho tite mone naga'i hiti luba hilana'mu yabe. To mone gihiti bo mone'mofihi naga'amagi ho tite mone kibina bomofihi naga'a hiti luba hilana'mu yabe. To babu hepatoga sipi kau'na enahalina to sipi imima'i hiti lilina'mu yabe. 8Asaga ya'mana kana huto hilinaya ai'i moneuba yagapana'i ketalube'mu nohigo yata'a gabu foya nolina suhi luto huto hilina'mu yabe.

9Yalo bomagi lenayato lite nagalugu lenele'mo melenogo kosele lili'na lilenogo alihi lenoho fililana'mu yabe. To nani kumu lite asaga boana'magi lenipakafa halana'mu yabe. 10Ya'mana yupahi babu boana'magi komopa'ani sibina hinogo enogo'anigihi enele'mete bite fateha'animagihi enayanuga nebite to enali'ani enogona'ani fateha'ani enele'moloto hilana'mu yabe. 11To kaga lu yege holata bo faga faga lite babu lite huto hilete babu boana'i enimi'i molomofa'na hilana'mu yabe. 12Foipa faipa suhi sipi'a tili tele hulenogo babu bomagi enali koguna ito minose'na'ani he'mi su halana'mu yabe. 13Ya hu'ehina bona'magi amuya melete nani kumu li pili kete nehago nani aku aluna Hu'mau enubuto bilina'mu yabe. 14To Hu'mamofihi kapo'amu luto ka lamana'a ya'ma asaga noto noto kapoga lu yege henogo asaga boana'i kehelilete fato fato hepalugu bai toto ana kana'a su halina'mu yabe.

Foipana laga mehinana huto hilina

Mk 13:14-23; Lk 21:20-24

15To foipa bati mehina napauba hepa'i li sibina hulata nohina lenali bu galana'mu yabe. To koyapa'i kaga lu huto huto bo Tanieliu anana'mu alu'ehina yabe. Ya'manana ai hepa'i Hu'mamofihi molo emise hetofa hepa'i folagaha'alo ho tito ya'ma sibina huto hilinamo'mu kaga lu'ehina yabe. Bo moneuba ya'mana kaga leka soloto ai ekesa yigi fe lino. 16To ya'mana yupahi Yutia melugu nehana lenali koli hite kosaguko tilo. 17To bo moneuba noha'a lebato nohutomo ai noha'alugati fe'noha'a limito melino. 18To bo mone foyagu nohutomo noha'nigati gukete'ni lilube luto mebino. 19Enali ana'i ya'mana kanalo yagapana hiti hi'ehilana to yagapana'i amihi epite minalanamagi kumu niginaga fi noepube. 20Lenali nunumu hite minalo, ya hilete yasi hilina yupahifi to fuli yupahi lenali koli mefelese minalabe. 21Ya'mana yupahi sipi keta huto minalina'mu yabe. To me'i yuhufa huto hina kana'alofi to koyapa'i ya'mana ketana huto mehu'ehina yabe. To alihi yupa hiti ana ketana huto mehilina'mu yabe. 22To Hu'mau ya'mana kana li hupa mone mehititaya asaga boana'i ma melugu meminatita'mu yabe. Ya hu'ehina Hu'ma ai enele'mo eto hu'ehina bona kumu'i ekesu mehalibe. Ya'mu luto ai ya'mana kana'a li hupa mone hilina'mu yabe.

23Ya'mana yupahi bo moneuba ma luto lu epilibe: Bu galo. Mesia ma nohibe, e'e muyaga nohibe, ya luto nolinogomo lenali kaga'a keheli meemilo. 24To faga faga Mesiagi to faga faga kaga lu yege hose bo babu lite nehetilete Hu'mau enele'mo eto hu'ehina bona'a enimi'i malalune lite babeyafana lumofihi lumofihi fato fato'i li huto hilana'mu yabe. 25Lenali kehelilo. Ya'ma ka'mu luto kohe toto yata'a kaga alu lepi'ohube.

26Ka melugu nohibe lite bona'magi nelinogomo lenali anaga ka'ani liyafa hite mebilo. To bu galo. Maga'ma fala kito nohibe lite nelinogomo lenali ka'ani keheli meepilo. 27Sopohi fi besa lolata nohina lenali akeheli'ahabe, ya'mana kegi'ati yege tiloto oto mobuto limi fololata nohinaga limi nofalabe. Ana suhi huto Kokulumaguti limi'ehina Bouba nani aku alube'mu hiluna yupahi aluna'mu yabe.

28Filise bona'i gufa'a mone hepatoga ni'igomo anaga lupahi ete li gehesa hilata nehabe.

Kokulumaguti limi'ehina Bo aku alihi alina kana'a

Mk 13:24-27; Lk 21:25-28

29Yesu ka mone hiti lu'ehina: Ma melugu sipi ketana huto hilina su ho su nohenogo ana'asilo mele'isi yege fi metepu noinogo to ikahi melenogo asaga sonofi'i kokulumalugu nina melugu limo i su halabe. Kokulumalugu amuyana ninana mopo hu baga ilana'mu yabe. 30Ya'mana yupahi Kokulumaguti limi'ehina Bomofihi gufa fayaha'a kokulumato huto nohinogo asaga boana'i ma melugu nehanamagi yibi hu baga ilabe. To Kokulumaguti limi'ehina Bo sopohi ifo'alo minoto noenogo bu galabe. To ai sipi amuya'a hiti to sipi fana meha'atu fi besa loto alina'mu yabe. 31To ai agelo'a babu lito enoho lifinogo enali ufehi fu linogo sipi nogo nomelenogo analo bona'a enele'mo eto hu'ehina guna ilina'mu yabe. To enali me'i nekisa'a loegi loegi ninalo mine baga ilete anagati bona'i guna ite ete bite me'i mone kegi'a nekisa'aga su halana'mu yabe.

Nemuya yafauba bona'i guna ise'mofihi hapa'a lelepilata nohibe

Mk 13:28-31; Lk 21:29-33

32Nemuya yafaloti lenali mana'a be go fiya ilete lilo. Nemuya yafa yaha'agu foba'a babu lito ni'igomo yuhufa haya'a nohesibe, ya nohigomo lenali hetofa yege kotaga lu'ehibe ya nohinagihe lite lilala nehabe. 33Ya'mana suhi luto alihi asaga'na huto nohinogo lenali be geletemo ma lite kehelilo, kana'a anasi a'o leba toloto hapi afilube'mu nohibe lite kehelilo. 34Nani ma'naka luto lu nolepube. Yatai kana'alo boana'i mefilise nehinogo ma asaga'na huto hilina'mu yabe. 35Kokuluma'i hiti me'i hiti su halinaya nani ka'ni fenene mehilina'mu minomo buto minalina'mu yabe.

Anana huto hilina yupa hiti kana'a hiti bo moneuba mekeheli'ehibe

Mk 13:32-37; Lk 17:26-30, 34-36

36Anana huto hilina yupahifi to kana'afi bo moneuba mekeheli'ehibe, kokulumalugu agelouba ana huto mekeheli'ehibe, to nani Hu'mamofihi pana'a nani'ni hiti ana huto mekeheli'ohube. Hu'mau aisigo anasi ana kana'a keheli'ehibe. 37Kokulumaguti limi'ehina Bo aku alina yupahiya Noaha yupahi huto hu'ehina suhi luto huto hilina'mu yabe. 38Koyapa'a Noaha kanalo nagami'i bilito enoho fi meto'ehigo asaga boana'magi ya'mana kana'alo sipi nose'na nete to ana'i kata hite nehago ana kana'alo Noau sipi botigu ti'ehina yabe. 39Ya hina enali ana boana'magi yana'mu huto hilube'mu nohinagi lite enekesa meyigise negi nagi nete nehago sipi nagami'i bililoto enoho fi to su ho'ehina yabe. Kokulumaguti limi'ehina Bo aku alube'mu hilina yupahi ya'mana suhi luto huto hilina'mu yabe. 40Ya'mana yupahi bo loemale'i foyagu lili'na lite nehi'inogo mone'amofihi le'mo fenene nohinogo mone'a ana foyagu lita i he'minogo minalibe. 41A'i loemale'i nose'na hesite nehi'inogo mone koto nehila'inaloti mone a'i le'mo fenene nohinogo mone a'i analo ai'asigo minalibe. 42Ya hu'ehinagi lenali Mesiau alina kana'a mekeheli'ahanagi kaba hu bati hite minalo. 43Lenali ya'ma kaga keheli bati hilo. Bo moneuba guminalo bo alina kana'a keheli'ehitita ai noha'alo kaba gimi giloto nohigo guminalo bouba ai noha'agu tiloto fe'noha'a li su mehalina'mu yabe. 44Ya hu'ehinagi lenali asaga yupahi lele hite kosaba kosaba hite minalo, hena'mugope? Kokulumaguti limi'ehina Bo aku limilina ya yupahi alibe lite lele hilana kana'alo mealina fato kanalo nehetilina'mu yabe.

Lili'na pana'i bati'a hiti to foipa'a pana'i hiti etali bame ka

Lk 12:41-48

45Lili'nalo pana'i mone hiya'a bati'a nohuto ai ekesa yigi bati huto lili'na'alo kaba hu bati nohibe? Kaba bo'auba luga'a lili'nalo pana'magi kaba bo'ani le'mo nomoloto kana'a nohinogo nose'na epilata pana'i yabe. 46Alihi sipi bo'auba olenogo asaga lu emi'ehina suhi li su ho'ohutomo ya'ma lili'nalo pana'i ai sipi gelo bino. 47Nani ma'naka luto lu nolepube, sipi bo'auba ya'mana pana'i le'moloto asaga fe'noha'alo li kaba gi etalina'mu yabe. 48To ai bati mehina lili'nalo pana'i nohutomo ai ma luto lilibe: Sipi bo'ni mele'isi i behe huto meabe. 49Ya luto luloto ai kaba hu epolo'ehina pana lalu'agi hiti luba nohuto to bia nagami'i nelete negi nagi nete nehana bo hiti nagami'i nalina'mu yabe. 50Ya huto ya'mana lili'nalo pana'uba sipi bo'a geba huto meminalinalo ana kana'asilo sipi bo'a nehetilibe. To ana pana'uba alina kana mekehelise nohilinalo yabe. 51Ya huto nohinogo sipi bo'auba naga osatu ana pana'i bi yigiloto le'moto buto fagalo bona enayanuga bilina'mu yabe. Ya hinogo enali ya'managa nehite sipi yibi bena nehite enagabu kumu usegi asegi ise hepato buto minalina'mu yabe.